ՔԱՐՈԶ

§Որովհետեւ պիտի գայ ժամանակ,

երբ բոլոր անոնք որ գերեզմաններու մէջ են՝

պիտի լսեն անոր ձայնը եւ դուրս պիտի ելլեն,

անոնք որ բարի գործեր ըրած են՝ կեանքի յարութեան համար,

իսկ անոնք որ չար գործեր ըրած են՝ դատաստանի յարութեան համար¦

(Յովհ. Ե. 29)

Յիսուս Շաբաթ օրով անդամալոյծ մը բուժած էր եւ զԱստուած կոչած իր Հայրը, բան մը որ խստակրօն հրեաներուն բնաւ հաճելի չէր թուած։ Անոնք ուզեցին այս դէպքը ու Յիսուսին խօսքերը  օգտագործել իր դէմ ըսելով թէ ան սրբապղծած էր Աստուծոյ սուրբ օրը՝ Շաբաթը, եւ Աստուած իր Հայրը կոչած։ Հրեանէր գայթակղած ասկէ, Յիսուսը կը նկատէին հայհոյիչ մը, որ ինքզինք Աստուծոյ հաւասար կը նկատէր։

Սակայն Քրիստոս, շեշտելու համար իսկութիւնը եւ իր առաքելութեան նպատակը, Աւետարանական այսօրուայ ընթերցումին այս հատուածին մէջ յստակ կերպով կ՚ըսէ զինք մտիկ ընող Հրեաներուն թէ ինքն իրմէ ոչ մէկ բան կրնար ընել եթէ Հայր Աստուած չըլլար իր հետ, միշտ կրկնելով իր եւ Աստուծոյ Հայրութեան ու Որդիութեան գաղափարը։ Աստուածորդին հոն եւս կանգ չառնելով ու քայլ մը աւելի առաջ երթալով, կը խօսի այն մեծամեծ գործերուն մասին զորս ինք պիտի կատարէր. §Ինչպէս որ Հայրը յարութիւն կու տայ մեռելներուն եւ կը կենդանացնէ, նոյնպէս եւ Որդին կը կենդանացնէ որուն որ ուզէ¦ (Յովհ. Ե. 21)։

Մեր Տիրոջ նկարագրած յարութիւնը, թէ՛ ֆիզիքական մահուան յաջորդող մեռելներէն վերակենդանանալու մասին էր եւ թէ ապաշխարութեան միջոցով Ողորմած Հօր կողմէն մեղքերու ներման ու Աստուածորդի Քրիստոսով եկող կատարեալ արդարացման։ Յիսուս ըսաւ. §Որովհետեւ պիտի գայ ժամանակ, երբ բոլոր անոնք որ գերեզմաններու մէջ են՝ պիտի լսեն անոր ձայնը եւ դուրս պիտի ելլեն, անոնք որ բարի գործեր ըրած են՝ կեանքի յարութեան համար, իսկ անոնք որ չար գործեր ըրած են՝ դատաստանի յարութեան համար¦ (Յովհ. Ե. 29)։ Յիսուս այս խօսքերով կը փորձէր Հրեաներուն հասկցնել թէ մարդիկ պիտի վարձատրուէին նաեւ Աստուծոյ կողմէ իրենց արարքներուն այսինքն կեանքի պտուղներուն համար եւս։ Իրական փրկուածները պիտի ըլլային անոնք միայն՝ որոնք կը հետեւէին ոչ թէ խստակրօնութեան կամ սոսկ մարդկային տրամաբանութեան այլ իր քարոզութիւններուն։ Իսկ իր խօսքերուն չհաւատացողները պիտի ենթարկուէին ահեղ դատաստանին ու կորուստին։

Սիրելիներ, որքան ալ այսօր մեզ համար ծանր հնչեն այս խօսքերը, սակայն մարդ արարածը միշտ պէտք է գիտնայ վճարել իր յանցանքներուն, սխալներուն, մեղքերուն, չարիքներուն պարտամուրհակը։ Իսկ ի՞նչպէս։ Քրիստոսի ներկայացուցած Հայրն ու Աստուածը խիստ դատաւոր մը չէ որ ծանր պատիժներ կը սահմանէ մարդուն։ Ընդհակառակը ողորմելու միշտ պատրաստ բարի Հայր մըն է Ան եւ անոնք որոնք գիտցած են հետեւիլ ու պահել իր Որդւոյն պատուիրանները, անպայման պիտի արժանանան յաւիտենական կեանքին։ Ուստի Հայր Աստուծոյ սէրը ու Աստուծորդի Յիսուսին աշխարհ գալը, անոր լուսաւոր պատուիրանները, խաչելութիւնը, մահը ու մեռելներէն հրաշափառապէս յարութիւնը միայն կրնայ վճարել մեզմէ իւրաքանչիւրին սխալներն ու մեղքերը։

Երբ մենք զԱստուած ճանչնանք մեր ամբողջ էութեամբ ու կեանքի փորձառութեամբ, խաւարէն կ՚անցնինք յաւիտենական լոյսին, նոր կեանքին։ Մեր Տէրը ըսաւ թէ բոլորս ալ պիտի վարձատրուինք մեր արարքներուն համաձայն, բարին՝ կեանքով, իսկ չամրը՝ դատաստանով։ Ուրեմն լսել ու հոգիով հետեւիլ այս պատուէրին պիտի նշանակէ թափանցել ա՛յն ճշմարտութեան՝ թէ անոնք որոնք Աստուծոյ կը պատկանին ուրիշ կարելիութիւն մը կը սպասէ իրենց։ Թերեւս մեր հոգեւոր վերազարթնումը անմիջապէս կամ շուտով չգայ, քանի անիկա նման է մանուկի մը ծննդեան եւ աճման գործընթացին, որ ժամանակ կը պահանջէ։

Եկէ՜ք աղօթենք, որ Հայր Աստուած մեզմէ իւրաքանչիւրիս տայ այդ ցանկութիւնն ու իմաստութիւնը ճանչնալու զԱստուած ո՚չ թէ միայն մեր միտքերով ու տրամաբանութեամբ, այլ մեր սիրտերուն, հոգիներուն ու միտքերուն ամբողջ զօրութեամբը։ Այո, թող խնդրենք մեր Երկնաւոր Հօրմէն, որպէսզի մեզի տայ հարկ եղած ուժն ու քաջութիւնը աներեր ընթանալու այս կեանքին մէջ, որ ըլլայ բոլորիս համար իսկապէս հոգեւոր ճամբորդութիւն մը, նման մեր սուրբ նախահայրերուն, որոնք միշտ գիտցան քալել Աստուծոյ հետ։

Թող այս խոհերով, զգացումներով ու սիրով կրկին անգամ ողջունենք իրար ըսելով. §ՔՐԻՍՏՈՍ ՅԱՐԵԱՒ Ի ՄԵՌԵԼՈՑ¦։

Զաքէոս Ծ. Վրդ. Օհանեան